Matematihkka mánáidgárddis

Matematihkka mánáidgárddis lea ráhkaduvvon čájehit ovdamearkkaid ja movttidahttit systemáhtalaččat bargat matematihkain mánáidgárddis. Girjjis leat konkrehta evttohusat mo stimuleret matematihkkaberoštumi. Matematihkka mánáidgárddis leat ollu evttohusat mo stohkosiiguin, spealuiguin, girjjiiguin jna. sáhttá bargat ovddidit máná giela. Ovdamearkkat 
čájehuvvojit sihke govaiguin ja teavsttaiguin. 

Mii deattuhat ahte rávisolmmoš láhčá buriid diliid mánáidgárddis nu ahte sihke movttidahttá mánáid, ja ahte aktiivvalaččat ja positiivvalaččat bargá mánáiguin ovttas. Buot doaimmat berrejit čadnot mánáidgárddi beaivválaš dillái ja nannet ovttasdoaimma eará mánáiguin. Nie sáhttá nannet máná giela ja matematihkka ovdáneami. 

Mánát jurddašit logálaččat, geavatlaččat ja konkrehtalaččat. Go mánát stoagadettiin fuomášit matematihkkaminstariid ja jurddašanvugiid, de sii dađistaga ovddidit matematihkkaáddejumi iežaset árgabeaivvis ja abstraherejit dan ávkkálaš reaidun ođđa diđolašvuođaide. 

Mis lei prošeaktajoavku gos ledje Álttá siidda bargit mielde: Sara Margrethe Skum Hætta, Anne Marie Vars ja Karen Anne Marit Buljo. Ovttas singuin ráhkadeimmet eanaš bargokoarttaid. Mánáidgárddis geahččaledje sii daid evttohusaid ja seammás váikkuhedje sin beaivválaš vásáhusat dan loahpalaš koartahábmema. 
Govat leat govviduvvon dábálaš stoahkandilis. 

Sámediggi, Davvi Statped ja Sámi earenomášpedagogalaš doarjalus leat resurssaid juolludemiin dahkan vejolažžan čađahit dán prošeavtta. Mii sávvat ahte Matematihkka mánáidgárddis šattašii ávkkálaš veahkkeneavvun mánáidgárddebargiide.