BIEBMU JA DEARVVAŠVUOHTA BARGOGIRJI 5.-7.CEAHKKI
Biebmu ja dearvvašvuohta bargogirji čuovvu Biebmu ja dearvvašvuohta oahppogirjji kapihttaliid.
Dás beasat hárjehallat ja čiekŋudit oahppogirjji fáttáide. Don beasat hárjehallat ja bargat sihke oahpes ja ođđa sániiguin ja doahpagiiguin iešguđetlágan miellagiddevaš bargobihtáid bokte. Muhtun bargobihtáin galggat lohkanáddejumi iskat ja ohcat ja čuoldit dieđuid. Don hástaluvvot maiddái čilget, čállit ja geardduhit dieđuid. Eará bargobihtáide fertet olggobealde skuvlaseinniid gávdnat čovdosiid. Beasat maid hárje-hallat dohkkehit ahte eai buot bargobihtáide leat čielga vástádusat, ja soitet vel máŋga rievttes vástádusa.
Oahppogirji: Oahppogirjjis beasat lohkat ja oahppat dan birra gos biebmu boahtá, máisttuid birra ja movt mii borramuša ráhkadit. Dalle fertet dovdat gievkkanreaidduid namahusaid ja málestanteknihkaid. Lea vuogas diehtit movt riibadit ja vurkkodit biepmu. Beasat maiddái oahpásnuvvat sámi árbevirolaš borranbáikkiide ja borrandábiide. Oahppogirjjis beasat lohkat ja oahppat dan birra makkár ávdnasat biepmus leat, movt rumaš ávkkástallá daid ja makkár eallindábiid ja borrandábiid mii berret válljet. Dasa lassin beasat lohkat ja oahppat biebmomáinnusteami, biebmolága ja biebmomearkkaid birra.
Neahttasiidu: Neahttasiiddus leat biebmoráhkadanneavvagat, filmmažat, lassi bargobihtát, evttohusat skuvlagievkkannjuolggadusaide, oahpaheaddjebagadus ja jahkeplánaevttohus.
Sávve oahpponeavvu šaddá miellagiddevaš ja ávkkálaš reaidun eambbo biepmu ja dearvvašvuođa birra oahppamii.
Almmuhan/Utgitt 2021
s:103
Dipma olggoš/heftet
