Eallin lea vuosttas girji 5.-7. cehkiide luonddufága oahppogirji. Čakčat 2022 ilbmet 2. ja 3. girji. Heidi Guttorm Einarsen lea ođđaseamos fágaplána vuođul čállán oahppogirjji. Dása sus lea leamaš allaskuvlalektor Jan Idar Solbakken fágalaš ráđđeaddin, ja May Synnøve Trosten fas pedagogalaš ráđđeaddin.
Luonddufága lea oahppat manne eana lea nu mo lea ja mo dat doaibmá. Luonddufága lea máhttit ávkkášstallat luonddu árbevirolaččat guoddevaš iešbirgejupmái vai mii birget ja ceavzit dan guovllus gos mii eallit ja ássat. Luonddufága lea vásihit, imaštit ja oahppat ođđa namahusaid. Luonddufága lea diehtoáŋgirit ohcat dieđuid, hutkat, iskat ja máŋgii dahkat boastut, muhto liikká joatkit geahččaladdat. Luonddufága lea maid dohkkehit ahte eai buot gažaldagaide leat čielga vástádusat.
Dán oahppogirjjis leat njealje oasi. Vuosttas oassi lea dan birra mii luondu ja luonddufága lea, ja fága bargovugiid birra. Nubbi oassi lea eatnama ja eallima álggu birra. Goalmmát oassi lea ealli organismmaid ja daid váldojuogu birra. Njealját oassi lea min dábálaš ekovuogádagaid birra ja luonddu biologalaš máŋggabealatvuođa birra.
Oahppogirjái lassin leat ČálliidLágádusa neahtas oahpaheaddjibagadus ja lassibargobihtát oahppiide.
ALMMUHAN/UTGITT 2022
Dipma olggoš/heftet
S: 223
Logg inn først
Logg inn
