Fierranjot Kirstte Rávdná & Doavtter-Aino Aura (doaimmah./red.)
Olggošgovva Čiskke Jovsset Biret Hánssa Outi (Outi Pieski)
Siiddaid Sápmi -girji čohkke diehto- ja čáppagirjjálaš čállosiid, maid leat čállán njunuš sámi dutkit, dáiddárat, servodatbargit ja aktivisttat Siidaskuvla-prošeavtta olis. Siidaskuvlla lea Kone-foandda ruhtadan prošeakta (2019–2023), man váldoulbmilin leamaš čielggadit siiddaid mearkkašumi ja vejolašvuođaid otná Sámi servodagas. Siidaskuvlla váibmosis lea sámi iešmearrideami ovddideapmi.
”Siiddat ovddastit sámiid historjjálaš iešmearrideami, autonomiija ja sámi diplomatiija. Dát árbi lea vuođđun dálá vuogádagaid dekoloniseremis ja iežamet servodatovttadagaid, vieruid ja árvvuid ealáskahttimis.”
Dán girjji čállosat vuođđuduvvet siidaskuvllalaččaid ovttastallamiidda ja oktasaš ságastallamiidda, árbediehttiid jearahallamiidda, iehčanas dutkamušaide ja eallinvásáhussii Sámis. Siiddaid Sápmi suokkardallá earret eará siidavuogádaga, árbedieđu ja vuoiŋŋalašvuođa mearkkašumi ja vejolašvuođaid servodathuksemis ja bajásgeassimis otná Sámis.
Girjji čállit
Fierranjot Kirstte Rávdná (Rauna Kuokkanen)
Doavtter-Aino Aura (Aura Mari Pieski)
Jalvvi Niillas (Niillas Holmberg)
Fierranjot Kirste (Kirste Paltto)
Doavtter-Piera Suvi Máret (Suvi West)
Bekkun Hánnu Asta Mitkijá (Asta Balto)
Beaska Niillas
Skuvllaalbmá Áslat Niillas Áslat (Áslat Holmberg)
Biehttára Juhána Ovllá-Ánte (Oula-Antti Labba)
Heaikka Jovsset Juha Anne-Maria (Anne-Maria Magga)
Siidaskuvlla oktavuođas leat maiddái jearahallan árbečehpiid ja oasi dáin ságastallamiin leat dál heivehuvvon čálalaš hápmái.
– Gová Lásse Nils-Heaika (Valkeapää) muitala veahki bivdimis
– Seidal Kerttu (Vuolab) sámi máinnastanárbbis
– Luobbal Sámmol Sofe (Aikio) mehciin ávkkástallamis
– Fierranjot Kirste (Paltto) dološ dábiin
– Iŋgor Ántte Ánte Mihkkala Sara Marielle (Gaup Beaska) luođi ja juoigama mearkkašumis
– Luobbal Sámmol Sámmol (Aikio) -rohki ee. Deanuleagi siiddaid, siidarájáid ja hálddašanvieruid birra
Dasa lassin girjjis leat kárttát dološ siidarájáin, maid Sámmol-rohki lea ovdal čohkken ja Elle Hánsa sárgon.
Girjji leaba doaimmahan Fierranjot Kirstte Rávdná (Rauna Kuokkanen) ja Doavtter-Aino Aura (Pieski). Fierranjot Kirstte Rávdná lea Deatnogáttis, Fierranjogas eret. Son bargá Lappi universitehta arktalaš eamiálbmotdutkamuša dutkanprofessoran Roavvenjárggas. Doavtter-Aino Aura lea eret Ohcejoh’njálmmis. Son lea oahpaheaddji ja oahppomateriálaid duddjojeaddji.
Almmuhuvvon: 2024-01
Čatnan: Dipma olggoš
Siiddut: 233
Giella: Davvisámegillii
ISBN: 9788293830085
Lágádus: DAT
Logg inn først
Logg inn
