Niillas Holmberg
Niillas Holmberga nuppi diktagirjjis nuorra almmái lea lávken guhkes lávkki ovddos guvlui. Ii dušše gielalaččat muhto maiddái mielalaččat.
Niillas stoahká sániiguin ja giellagovaiguin. Sus lea čielgasit iežas vuohki hukset sániiguin govaid ja dihkkádit bálgáid, mat dolvot lohkki divtta máilbmái. Konkrehtalaš giella addá buori coavcci čuovvolit su jurdagiid.
Luondu lea oppa áigge fárus su divttain. Njuolga dahje mohki bokte. Su humoristtalaš vuohki cuigestallat ja seammás veaháš iežasge bilkidit bidjá lohkki himáhallat ja nivkkuhit, ahte aiddo fal nie. Niillas ii njávkka miehtegulgii. Son dadjá njuolga, go dasa lea dárbu. Girjjis leat olu maid litna sánit, ráhkesvuohta maid muhtimat váillahedje su vuosttas girjjis.
Niillas lea máŋggabealat dáiddár. Son čállá divttaid ja lávlagiid, bidjá šuoŋaid, lávlu ja čuojaha. Dasa lassin son lea neavttár. Son eallá dálá ođđa áiggis, muhto ii fal ruohttasiid haga. Su divttain vuhtto maid man čiekŋalit son gudnejahttá máttuideamet, muhto gal son máhttá jurddašit ovddos guvluige.
Niillas bovttii juo vuosttas girjjiinis, Dego livččen oaidnán iežan, nuoraid ja ollesolbmuid beroštumi ja dát nubbi girji lea dakkár, mii duođas rohtte olbmo fárrui ja lokte divttain návddašeami áibbas ođđa dássái.
Niillasa divttain leat jo beassan illudit maiddái olgoriikkain. Son lea dolvon sámi girjjálašvuođa omd. Kolombiai Medellínii, máilmmi stuorámus diktafestiválii, gos son logai divttaidis sámegillii ja báikkálaš čeahpit fas spánskkagillii.
Girjji govaid lea Antti Väre, Tamperes, sárgon.
Dát girji lei evttohuvvon Davviriikkaid Ráđi Girjjálašvuođa Bálkkašupmái 2015. Girjjis son oaččui Sámiráđi Girjjálašvuođa bálkkašumi 2014. Niillas (r. 1990) ja lea eret Ohcejogas.
Almmuhuvvon: 2013
Čatnan: Garra olggoš
Siiddut: 136
Giella: Davvisámegiella
ISBN: 9788290625714
Lágádus: DAT
Logg inn først
Logg inn
